Fellsmörk - myndasíður

Ennþá meira og minna ófært eða illfært á Fellsmörk í lok október 2009

Myndir teknar á Fellsmörk 25. október 2009

Skarð í veginum fyrir sunnan Klifandi

Varnaðarmerking er á veginum inn í Fellsmörk fyrir sunnan brúna yfir ána Klifandi. Þar er skarð í veginn og þarf að fara með gát þó vegurinn sé ekki ófær í sjálfu sér. Fyrir innan ána er vegurinn rudd slóð á kafla þar sem áin flæddi yfir í vatnavöxtum í haust. Sjá einnig næstu mynd.

Brúin yfir Klifandi

Athyglisvert er að skoða brúna yfir Klifandi. Það er eðli jökuláa að bera fram aur og þar sem þær liggja á flatlendi eins og fyrir neðan Fellsmörk skilja þær aurinn eftir. Við það hleðst upp aurkeila og hægt og rólega er áin að fylla undir brúargólfið með sínum framburði. Nokkuð ljóst er að áin rann ekki svona undir brúna þegar hún var búin til, heldur er þetta seinni tíma þróun. Einhver gæti haldið að brúin væri hægt og rólega að síga niður en það er alls ekki raunin heldur er landslagið undir brúnni að rísa upp undir brúargólfið.

Hafursá í Keldudal

Á yfirlitsmyndinni að ofan sést hvernig Hafursá flæmist um sandinn fyrir neðan Hlíðarbraut. Vegarstæðið er nokkurn veginn þar sem áin rennur upp við gróðurlendið. Erfitt er að komast þarna inneftir þar sem aka þarf á móti straumi til að komast ef ekki er farið alveg yfir álinn og ekið á aurnum. Ef það er gert skapast aftur hætta á að festast í sandi sem áin ber með sér. Ath. að hægt er að smella á myndina til að fá hana stóra.

Á myndinni að ofan sést hvar slóðinn liggur út í Harfursána. Þarna er áin ekki mjög vatnsmikil og var hægt að komast yfir og upp á móti straumnum en ekki má vaxa mikið þannig að þetta verði ófært. Þar fyrir utan er leiðin auðvitað kolófær fyrir fólksbíla.

Á næstu mynd sést hvar eystri leiðin liggur upp í Keldudal. Slóðinn horfinn með öllu.

Og svona í lokin er ein mynd sem ekki er af vatnavöxtum og öðru veseni. Húsin í Keldudal kúra undir hlíðinni óáreitt af Hafursánni!

______________________
Ljósm. Einar Ragnar Sigurðsson